பாவூர்சத்திரம் ஒளவையார் அரசு மகளிர் மேல்நிலைப்பள்ளியில் சுமார் 1750 மாணவியர் படித்து வருகின்றனர். திருநெல்வேலி-தென்காசி நெடுஞ்சாலையில் அமைந்துள்ள இப்பள்ளி மைதானமானது பள்ளமாக காணப்படுவதால் மழைக்காலங்களில் பள்ளி நுழைவு வாயிலில் இருந்து மைதானம் முழுவதும் தண்ணீர் தேங்கிவிடும். இதனால் மாணவிகள் மற்றும் ஆசிரியர்கள் மிகுந்த சிரமத்திற்கு உள்ளாகி வருகின்றனர்.
தென்காசி முன்னாள் சட்டமன்ற உறுப்பினர் எஸ்.செல்வமோகன்தாஸ்பாண்டியன், கீழப்பாவூர் யூனியன் சேர்மனாக இருந்த சமயத்திலும், சட்டமன்ற உறுப்பினராக இருந்த சமயத்திலும் மைதானத்தில் தண்ணீர்; தேங்காத வண்ணம்மணல் நிரப்ப ஏற்பாடு செய்திருந்தார். இந்நிலையில்தற்போது திருநெல்வேலி-தென்காசி நான்கு வழிச்சாலை பணிகள் நடைபெற்று வருவதால் சாலை உயர்ந்து விட்ட காரணத்தால் மீண்டும் பள்ளி மைதானம் பள்ளமாகி, தண்ணீர்; தேங்கி ஆரம்பித்துள்ளது.
இதையடுத்து பள்ளி தலைமை ஆசிரியை ஜான்சிராணி மற்றும் ஆசிரியர்கள், நெல்லை தெட்சணமாறநாடார் சங்கத்தலைவரும், பாவூர்சத்திரம் தொழிலதிபருமான ஆர்.கே.காளிதாசன் மூலம் சாலைப்பணியில் ஈடுபட்டு வரும் பி அண்ட் சி நிறுவனத்தின் கவனத்திற்கு கொண்டு சென்று, அவர்கள் மூலம் பள்ளமாக கிடந்த மைதானத்திற்கு மணல் நிரப்ப ஏற்பாடு செய்தனர். அதன்படி பள்ளி நுழைவு வாயில், மைதானம் முழுவதும் தண்ணீர் தேங்காத வண்ணம் மணல் நிரப்பப்பட்டது. மேலும் இப்பள்ளி புதிய கட்டிடத்தின் அருகில் புதர் போல் மண்டி கிடந்த செடிகளை அகற்றியதுடன், அப்பகுதியில் சரல் மணல் நிரப்ப ஏற்பாடு செய்வதாகவும் அந்நிறுவனம் சார்பில் உறுதியளிக்கப்பட்டது.
இதையடுத்து பள்ளி தலைமை ஆசிரியை ஜான்சிராணி தலைமையில் ஆசிரியர்கள் மணல் நிரப்ப ஏற்பாடு செய்த தெட்சணமாறநாடார் சங்கத்தலைவர் ஆர்.கே.காளிதாசன், பி அண்ட் சி நிறுவன மேலாளர் கென்னடி ஆகியோரை சந்தித்து நன்றி தெரிவித்ததுடன், நினைவு பரிசு வழங்கி பாராட்டினர். இந்நிகழ்ச்சியில் உதவி தலைமை ஆசிரியர் சிவபார்வதிநாதன், முதுகலை இயற்பியல் ஆசிரியை ஜெகதா, பட்டதாரி ஆசிரியர் மில்டன், அலுவலக பணியாளர் பீட்டர் ஆரோக்கியசாமி, முன்னாள் ஊராட்சி மன்ற தலைவர் அருணோதயம், நாராயணசிங்கம் உள்ளிட்டோர் கலந்து கொண்டனர்.
1 கருத்துகள்
அருமை அனைத்து நல் உள்ளங்களுக்கும் பாராட்டுக்கள் 👏👏
பதிலளிநீக்கு